Պաշտոնը՝ Տարեկան զեկույցի պատրաստման փորձագետ

Ծրագիրը՝ Հայաստանի քրեակատարողական հիմնարկներում մարդու իրավունքների պաշտպանության հզորացում

Իրականացնող կազմակերպությունը՝ «Դիգնիթի» Մարդասիրական ՀԿ (Քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի համակարգող կազմակերպություն)

Տևողությունը՝ 7 ԱՄԻՍ (40 ԱՇԽԱՏԱՆՔԱՅԻՆ ՕՐ 7 ԱՄՍՎԱ ԸՆԹԱՑՔՈՒՄ)

1․ ՆԱԽԱՊԱՏՄՈՒԹՅՈՒՆ

«Դիգնիթի» Մարդասիրական ՀԿ-ն, որպես ՀՀ ԱՆ քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խմբի (Դիտորդների խումբ) համակարգող կազմակերպություն, իրականացնում է «Հայաստանի քրեակատարողական հիմնարկներում մարդու իրավունքների պաշտպանության հզորացում» ծրագիրը։

Ծրագրի նպատակն է նպաստել քրեակատարողական հիմնարկներում մարդու իրավունքների պաշտպանության ամրապնդմանը՝ առողջապահական ծառայությունների, պահման պայմանների և ազատությունից զրկված անձանց նկատմամբ վերաբերմունքի ոլորտներում համակարգային խնդիրների բացահայտման, մշտադիտարկման, փաստաթղթավորման, զեկուցման և շահերի պաշտպանության միջոցով։

Ծրագրի շրջանակում Դիտորդների խմբի անդամները կիրականացնեն մշտադիտարկման այցեր, կպատրաստեն համապատասխան զեկույցներ և կհավաքագրեն տվյալներ, որոնց հիման վրա արտաքին փորձագետը կպատրաստի համապարփակ տարեկան զեկույց։

2․ ՆՊԱՏԱԿԸ

Սույն առաջադրանքի նպատակն է վերլուծել ծրագրի ընթացքում հավաքագրված մշտադիտարկման արդյունքները և պատրաստել տարեկան զեկույց՝ գնահատելով Հայաստանի քրեակատարողական հիմնարկներում մարդու իրավունքների վիճակը, մասնավորապես առողջապահական ծառայությունների մատչելիության և որակի, պահման պայմանների, ազատությունից զրկված անձանց նկատմամբ վերաբերմունքի և առկա համակարգային խնդիրների տեսանկյունից։

3․ ԱՇԽԱՏԱՆՔՆԵՐԻ ՇՐՋԱՆԱԿԸ

Փորձագետը պետք է՝

● Ուսումնասիրի և վերլուծի Դիտորդների խմբի անդամների կողմից պատրաստված մշտադիտարկման հաշվետվությունները,

● Վերլուծի պլանային և արտահերթ այցերի ընթացքում հավաքագրված տվյալներն ու արձանագրված դեպքերը,

● Վերլուծի առողջապահության, պահման պայմանների և մարդու իրավունքների խախտումների վերաբերյալ բողոքներն ու փաստերը,

● Բացահայտի համակարգային խնդիրները, միտումները և օրինաչափությունները,

● Գնահատի քրեակատարողական առողջապահության և պահման պայմանների ոլորտում իրականացված բարեփոխումների գործնական ազդեցությունը,

● Մշակի հիմնավորված եզրակացություններ և առաջարկություններ պետական մարմինների և այլ շահագրգիռ կողմերի համար,

● Պատրաստի տարեկան զեկույցի նախագիծը,

● Ներկայացնի նախագիծը Դիտորդների խմբին և հաշվի առնի ներկայացված առաջարկությունները,

● Ներկայացնի տարեկան զեկույցի վերջնական տարբերակը։

4․ ԱԿՆԿԱԼՎՈՂ ԱՐԴՅՈՒՆՔՆԵՐԸ

Փորձագետը պետք է ներկայացնի՝

1. Տարեկան զեկույցի կառուցվածքն ու մեթոդաբանությունը,
2. Տարեկան զեկույցի նախնական տարբերակը,
3. Դիտորդների խմբի և «Դիգնիթի» Մարդասիրական ՀԿ-ի դիտողությունները ներառող վերջնական տարբերակը,
4. Ամփոփագիր և հիմնական առաջարկություններ՝ շահերի պաշտպանության և հանրային իրազեկման նպատակներով։

5․ ԶԵԿՈՒՅՑԻ ԲՈՎԱՆԴԱԿՈՒԹՅՈՒՆԸ

Տարեկան զեկույցը պետք է ներառի առնվազն հետևյալ բաժինները՝

● Ամփոփագիր,

● Մեթոդաբանություն,

● Մշտադիտարկման գործունեության նկարագրություն,

● Քրեակատարողական հիմնարկներում առողջապահական ծառայությունների գնահատում,

● Պահման պայմանների գնահատում,

● Մարդու իրավունքների խախտումների և բողոքների վերլուծություն,

● Համակարգային խնդիրների և բարեփոխումների գնահատում,

● Դրական փորձի և առաջընթացի ներկայացում,

● Եզրակացություններ,

● Առաջարկություններ։

6․ ԾԱՌԱՅՈՒԹՅՈՒՆՆԵՐԻ ԿԱՏԱՐՄԱՆ ԺԱՄԱՆԱԿԱՀԱՏՎԱԾ

Աշխատանքներն իրականացվելու են 2026 թվականի հուլիսից մինչև 2027 թվականի հունվար ընկած ժամանակահատվածում։

Փորձագետի ներգրավվածությունը կկազմի մինչև 40 աշխատանքային օր՝ բաշխված ծրագրի իրականացման ողջ ընթացքում։

7․ ՊԱՀԱՆՋՎՈՂ ՈՐԱԿԱՎՈՐՈՒՄՆԵՐԸ

● Բարձրագույն կրթություն իրավունքի, մարդու իրավունքների, հանրային կառավարման, հանրային առողջապահության, սոցիալական գիտությունների կամ հարակից ոլորտներում,

● Առնվազն 5 տարվա փորձ հետազոտությունների, մշտադիտարկման, մարդու իրավունքների պաշտպանության կամ վերլուծական զեկույցների պատրաստման ոլորտներում,

● Վերլուծական և քաղաքականությանն առնչվող փաստաթղթերի պատրաստման փորձ,

● Մարդու իրավունքների միջազգային չափանիշների, հատկապես ազատությունից զրկված անձանց իրավունքների ոլորտի լավ իմացություն,

● Գերազանց վերլուծական և գրավոր հաղորդակցման հմտություններ,

● Հայերեն լեզվով բարձրորակ մասնագիտական տեքստեր պատրաստելու կարողություն։

8․ ՀԱՇՎԵՏՎՈՂԱԿԱՆՈՒԹՅՈՒՆ ԵՎ ՎԵՐԱՀՍԿՈՒՄ

Փորձագետը կաշխատի Ծրագրի ղեկավարի ընդհանուր վերահսկողության ներքո և սերտ համագործակցությամբ Ծրագրի օգնականի ու Դիտորդների խմբի անդամների հետ։

9․ ՎՃԱՐՄԱՆ ՊԱՅՄԱՆՆԵՐ

Վճարումը կիրականացվի աշխատանքների ամբողջական և բավարար կատարման, ինչպես նաև տարեկան զեկույցի վերջնական տարբերակի ընդունումից հետո՝ ըստ աշխատած օրերի քանակի վերաբերյալ հանձնման-ընդունման ակտի։

10․ ԳԱՂՏՆԻՈՒԹՅՈՒՆ

Փորձագետը պարտավորվում է պահպանել իր գործունեության ընթացքում ստացված բոլոր տեղեկությունների և փաստաթղթերի գաղտնիությունը և չտրամադրել դրանք երրորդ կողմերին առանց «Դիգնիթի» Մարդասիրական ՀԿ-ի նախնական գրավոր համաձայնության։

Դիմելու կարգը

Հետաքրքրված անձինք պետք է ներկայացնեն հետևյալ փաստաթղթերը՝

● Ինքնակենսագրություն (CV),

● Նախկինում իրականացրած աշխատանքների մասին հավստում /զեկույցների հղումներ և այլն/,

● Ֆինանսական առաջարկ՝ նշելով մեկ աշխատանքային օրվա արժեքը (դրույքաչափը)։

Ֆինանսական առաջարկը պետք է ներկայացվի ՀՀ դրամով և ներառի Հայաստանի Հանրապետության օրենսդրությամբ սահմանված բոլոր հարկերը, տուրքերը և այլ պարտադիր վճարները։

Դիմումներն անհրաժեշտ է ուղարկել [email protected] էլեկտրոնային հասցեին, պատճենը` [email protected] էլեկտրոնային հասցեին: Նամակի նպատակ դաշտում նշել «Տարեկան զեկույցի փորձագետ - PMG»։

Դիմումների ընդունման վերջնաժամակետն է 2026թ․-ի հունիսի 26-ը, ժամը 18։00։

Միայն նախնական ընտրությունն անցած թեկնածուները կհրավիրվեն հարցազրույցի։

Ծրագիրն իրականացվում է Ժողովրդավարության Զարգացման Հիմնադրամի ֆինանսական աջակցությամբ։