Այսօր նշում ենք ԴԻԳՆԻԹԻ Մարդասիրական հասարակական կազմակերպության գործունեության 28 տարին՝ նվիրված մարդու իրավունքների պաշտպանությանը, առողջության պահպանմանը, կարողությունների զարգացմանը, սոցիալական աջակցությանը, արժանապատվության և խոցելի խմբերի շահերի պաշտպանությանը։

Կազմակերպության գործունեությունը տարիների ընթացքում կառուցվել է մարդու հիմնարար իրավունքների և ազատությունների համընդհանուր սկզբունքների վրա՝ առաջնորդվելով միջազգային իրավունքի առանցքային փաստաթղթերով, այդ թվում՝ Մարդու իրավունքների համընդհանուր հռչակագրով, Քաղաքացիական և քաղաքական իրավունքների միջազգային դաշնագրով և Եվրոպական կոնվենցիաներով։

ԴԻԳՆԻԹԻ-ն իր աշխատանքով նպաստում է իրավունքի գերակայության ամրապնդմանը, խտրականության բացառմանը, հանրային առողջության պահպանմանը, սոցիալական բարեկեցության և արդարության առաջխաղացմանը։

28 տարիների ընթացքում կազմակերպությունը ձևավորել է վստահելի և պատասխանատու դերակատարում քաղաքացիական հասարակության համակարգում՝ իրականացնելով մոնիթորինգ, իրավապաշտպան գործունեություն, հանրային իրազեկում և շահերի պաշտպանություն՝ հատկապես խոցելի և մարգինալացված խմբերի համար։

ԴԻԳՆԻԹԻ-ն հետևողականորեն աջակցում է մարդու իրավունքների պաշտպանության միջազգային և ազգային մեխանիզմների կիրառմանը՝ նպաստելով պետության կողմից ստանձնած պարտավորությունների իրականացմանը և հաշվետվողականության բարձրացմանը։

Մենք բարձր ենք գնահատում մեր գործընկերների, միջազգային կազմակերպությունների և բոլոր աջակիցների ներդրումը, որոնց հետ համագործակցությամբ հնարավոր է դարձել հասնել տեսանելի և կայուն արդյունքների։

Այս կարևոր տարեդարձը ոչ միայն անցած ճանապարհի գնահատման առիթ է, այլև վերահաստատում՝ շարունակելու մեր առաքելությունը՝ ի նպաստ ներառական, առողջ, արժանապատիվ և իրավահավասար հասարակության ձևավորմանը՝ մարդու իրավունքների պաշտպանության, որակյալ և հասանելի առողջապահական ծառայությունների ապահովման, կարողությունների զարգացման, սոցիալական աջակցության համապարփակ ծրագրերի և համակարգային փոփոխություններին ուղղված գործողությունների միջոցով։