«Դիգնիթի» Մարդասիրական հասարակական կազմակերպությունը (ԴԻԳՆԻԹԻ) բարձր է գնահատում Եվրոպայի Խորհրդի մարդու իրավունքների հանձնակատար Մայքլ Օ՛Ֆլահերթիի կողմից Հայաստանի Հանրապետության վարչապետին ուղղված նամակը՝ այն դիտարկելով որպես սկզբունքային և ժամանակին ուղերձ Հայաստանում մարդու իրավունքների պաշտպանության ապահովման ոլորտում։

Նամակում բարձրացված հարցերը չեն սահմանափակվում դիտարկումներով․ դրանք ուղղակիորեն մատնանշում են այն համակարգային բացերը, որոնք շարունակում են խոչընդոտել մարդու իրավունքների լիարժեք պաշտպանությանը Հայաստանում։ Մասնավորապես, խտրականության դեմ համապարփակ օրենսդրության բացակայությունը և խոցելի խմբերի պաշտպանության ոչ բավարար մակարդակը շարունակում են մնալ չլուծված խնդիրներ։

Այս համատեքստում Եվրոպայի Խորհրդի ուղերձը պետք է ընկալվի ոչ թե որպես արտաքին գնահատական, այլ որպես հստակ հիշեցում Հայաստանի կողմից ստանձնած միջազգային պարտավորությունների մասին։ Մարդու իրավունքների, օրենքի գերակայության և հավասարության սկզբունքները ենթակա չեն ընտրողական կիրառման։

ԴԻԳՆԻԹԻՆ ընդգծում է, որ ներկայիս փուլում անհրաժեշտ է անցում հայտարարություններից դեպի չափելի և հաշվետու գործողությունների։ Մասնավորապես՝

• ընդունել խտրականության դեմ համապարփակ և կիրառելի օրենսդրություն՝ ՍԿԳԻ-ն ներառելով որպես պաշտպանված հիմք,
• ապահովել իրավական պաշտպանության արդյունավետ մեխանիզմներ խոցելի խմբերի համար,
• երաշխավորել պետական մարմինների կողմից մարդու իրավունքների ստանդարտների հետևողական կիրարկումը,
• ձևավորել թափանցիկ և հաշվետու գործընթացներ՝ միջազգային գործընկերների հետ համագործակցության շրջանակում։

Միջազգային կառույցների կողմից բարձրացված հարցերը հնարավորություն են՝ վերանայելու առկա քաղաքականությունները և ամրապնդելու իրավական և ինստիտուցիոնալ համակարգերը։ Սակայն դրանց անտեսումը կամ ձևական արձագանքը միայն խորացնելու է առկա խնդիրները և կվնասի Հայաստանի ժողովրդավարական հեղինակությանը։

ԴԻԳՆԻՆԹԻՆ վերահաստատում է իր պատրաստակամությունը՝ համագործակցելու պետական մարմինների և միջազգային գործընկերների հետ՝ ապահովելու մարդու իրավունքների պաշտպանությունը՝ համապատասխան եվրոպական չափանիշներին։

Միևնույն ժամանակ, մենք ակնկալում ենք, որ բարձրացված հարցերը կստանան հստակ, ժամանակացույցով պայմանավորված, հրապարակային արձագանք՝ ուղեկցվելով գործնական ու հասցեական քայլերով՝ ուղղված բոլոր խոցելի խմբերի, այդ թվում ԼԳԲՏՔԻ անձանց պաշտպանությանը, և զերծ մնալով խուսափողական և ընդհանրացված քաղաքականությունից։