Կան օրեր, երբ ամանորը գալիս է ավելի շուտ։ Ոչ ժամկետներով, ոչ թվերով, այլ՝ ժպիտներով, երեխաների աչքերի փայլով ու այն պահերով, որոնք երկար են հիշվում։ Արդեն ավանդույթ դարձած ամանորյա քարավանը հենց այդ օրերից մեկն է։

Արդեն երկար տարիներ է, ինչ «Դիգնիթի»-ն համագործակցում է «Կոկա-Կոլա Հելենիկ Հայաստան» ընկերության հետ։

Այս համագործակցությունը տարիների ընթացքում դարձել է սպասված տոն մեր շահառուների երեխաների համար։

Ամեն ձմեռ, Ձմեռ Պապիկի ուղեկցությամբ, ամանորյա քարավանը այցելում է մեր մարզային գրասենյակներ՝ իր հետ բերելով նվերներ, ուրախություն և իսկական տոնական մթնոլորտ։ Այս տարի ևս ավանդույթը շարունակվեց։ Ամանորյա քարավանը նախ կանգ առավ մեր Գյումրու գրասենյակում, ապա՝ Վանաձորում։ Երեխաների ծիծաղը, խաղերը և անկեղծ ուրախությունը լցրեցին տարածքը՝ վերածելով սովորական օրը հիշարժան տոնի։ Նվերները կարևոր էին, բայց ամենակարևորը՝ ուշադրությունն էր, ջերմ խոսքը և այն զգացումը, որ այս օրերին ինչ-որ մեկը հենց իրենց մասին է մտածել։ Այսպիսի պահերն են, որ հիշեցնում են՝ սոցիալական պատասխանատվությունը միայն ծրագրեր և հաշվետվություններ չեն։ Դա նաև մարդկանց կողքին լինելն է, հատկապես՝ երեխաների, ովքեր բոլորից շատ են հավատում հրաշքներին։

Շնորհակալ ենք «Հելենիկ Կոկա-Կոլա Հայաստան»-ին՝ տարիներ շարունակ մեր շահառուների երեխաներին ամանորի ջերմությունը փոխանցելու և այդ հավատը կենդանի պահելու համար։