ՀՀ ԱՆ քրեակատարողական հիմնարկներում հասարակական վերահսկողություն իրականացնող դիտորդների խումբը 2026թ․-ի մարտի 26-ին իրականացրել է այց «Արմավիր» ՔԿՀ և արձանագրել մի շարք մտահոգիչ փաստեր։

Ազատազրկվածները հրաժարվում են սննդից

Դիտորդները արձանագրել են, որ ՔԿՀ-ում սնունդը հաճախ մնում է չօգտագործված՝ վատ որակի պատճառով։ Այնուհետև այն հավաքվում և վերադարձվում է մատակարարին՝ առաջացնելով պետական միջոցների հնարավոր վատնում։ Այցի օրը մատուցված խաշը, ըստ ազատազրկվածների, շատ դեպքերում եղել է առանց մսի և անորակ, ինչի պատճառով մարդիկ պարզապես չեն օգտվել սննդից։

ՀՀ արդարադատության նախարարությունը Խմբին ուղղված գրությամբ ևս փաստել է, որ հատկացված սննդամթերքներից և ճաշատեսակներից առաջացած սննդի թափոնները կազմել են միջինում 19.46%: Սննդի թափոնները բացառելու նպատակով նախարարությունը պայմանագրային փոփոխություններ է կատարել մատակարարողի հետ։

Խցերի անբարենպաստ վիճակը․կաթացող առաստաղներ

Ինչպես քրեակատարողական հիմնարկի ընդհանուր միջանցքներում, այնպես էլ որոշ խցերում արձանագրվել են խոնավությունից փչացած պատեր և առաստաղներ։ Խցերից մեկի սանհանգույցի առաստաղից անընդհատ ջուր է կաթում։ Ազատազրկվածները խնդիրը ժամանակավորապես լուծել են ինքնուրույն՝ պոլիէթիլենային տոպրակով փակելու միջոցով։

Ի պատասխան Խմբի ահազանգի, ՀՀ արդարադատության նախարարությունը հայտնել է, որ արդեն իսկ փոխարինվել է թիվ 506 խցի վերնահարկում գտնվող թիվ 530 խցում առկա վնասված ասիական զուգարանակոնքը և խողովակները: Ներկայումս նշված հատվածում ջրի արտահոսք առկա չէ։ Նշել է նաև, որ 2025-2026 թվականների ընթացքում Հիմնարկում իրականացվել են լայնածավալ վերանորոգման աշխատանքներ:

Զբաղվածության բացակայություն

Խաղասենյակը չի գործում և վերածվել է պահեստի՝ սահմանափակելով ազատազրկվածների ժամանցի հնարավորությունները։

ՀՀ արդարադատության նախարարությունը հայտնել է, որ խաղասենյակում պահեստավորված բժշկական գույքը դուրս կբերվի։

Իրավունքների խախտման անհատական դեպքեր

• Օտարերկրյա քաղաքացի ազատազրկվածներից մեկը ո՛չ դատարանի, ո՛չ էլ ՔԿՀ-ի կողմից չի տեղեկացվել իր վերաբերյալ կայացված դատավճռի մասին և չի ստացել քրեական գործի վերաբերյալ որևէ փաստաթուղթ՝ անգամ հայերեն լեզվով։ Հիշեցնենք, որ մեղադրյալն իրավունք ունի նաև անվճար ստանալու եզրափակիչ դատական ակտի պատճենը իր համար հասկանալի լեզվով /ՀՀ քրեական դատավարության օրենսգրքի 27-րդ և 43-րդ հոդվածներ/։
• Ազատազրկված մի քանի անձինք դժգոհություն են հայտնել ՔԿՀ ՍՀԻԱ բաժնի իրավաբանի և հոգեբանի աշխատանքներից։
• Արձանագրվել է դեպք, երբ առողջական խնդիրներ ունեցող անձը պահվել է խոնավ պատժախցում։

Ինքնասպանության փորձ․ ազատազրկված անձը փորձել է ինքնասպանություն գործել՝ նշելով առողջական խնդիրներն ու բուժօգնության բացակայությունը որպես հիմնական պատճառներ։

Դիտորդների խումբն արձանագրված խնդիրների վերաբերյալ Հրատապ հաշվետվություն է ներկայացրել ՀՀ արդարադատության նախարարություն՝ ակնկալելով իրավիճակի համապարփակ ուսումնասիրություն։ 2026թ-ի ապրիլի 9-ին ստացվել է ՀՀ արդարադատության նախարարության պատասխան գրությունը։

ԽՈՒՄԲԸ ՀԱՅՏԱՐԱՐՈՒՄ Է, ՈՐ ՇԱՐՈՒՆԱԿԵԼՈՒ Է ԲԱՐՁՐԱՁԱՅՆԵԼ ՀԱՄԱԿԱՐԳԱՅԻՆ ԽՆԴԻՐՆԵՐԸ ԵՎ ՀԵՏԵՎԵԼ ԴՐԱՆՑ ԼՈՒԾՄԱՆԸ։

Դիտորդների խմբի գրություն

ՀՀ արդարադատության նախարարության պատասխան գրություն

Դիտորդների խմբի գրություն

ՀՀ արդարադատության նախարարության պատասխան գրություն