Հանդիպում-քննարկում՝ նվիրված Հոմոֆոբիայի, բիֆոբիայի և տրանսֆոբիայի դեմ պայքարի միջազգային օրվան

2026թ․մայիսի 15-ին՝ Հոմոֆոբիայի, բիֆոբիայի և տրանսֆոբիայի դեմ պայքարի միջազգային օրվան ընդառաջ, Հայաստանում Ֆրանսիայի դեսպանատան աջակցությամբ «Դիգնիթի» Մարդասիրական ՀԿ-ի նախաձեռնությամբ տեղի ունեցավ բարձր մակարդակի հանդիպում քննարկում՝ Հայաստանում արտակարգ և լիազոր դեսպանների, դիվանագիտական և միջազգային կառույցների, պետական և հասարակական կառույցների ներկայացուցիչների մասնակցությամբ։

Հանդիպման նպատակն էր քննարկելու մարդու իրավունքների ոլորտում առկա խնդիրներն ու զարգացման հնարավորությունները Հայաստանում՝ ժողովրդավարության ճանապարհին։

Միջոցառումը մեկնարկեց «Դիգնիթի» ՀԿ նախագահ Սերգեյ ԳԱԲՐԻԵԼՅԱՆԻ բացման խոսքով, ով ողջունեց մեծարգո հյուրերին՝ անդրադառնալով օրվա կարևորությանը, Հայաստանում և տարածաշրջանում ԼԳԲՏ+ անձանց, միգրանտների, փախստականների և այլ խոցելի խմբերի առջև կանգնած մարտահրավերներին, ինչպես նաև ընդգծեց խարանի, խտրականության և ատելության խոսքի դեմ համատեղ պայքարի անհրաժեշտությունը։

Այնուհետև ողջույնի խոսքերով հանդես եկան բարձրաստիճան պաշտոնյաներ և միջազգային գործընկերներ, այդ թվում՝

• Հայաստանի Հանրապետության մարդու իրավունքների պաշտպան Անահիտ ՄԱՆԱՍՅԱՆԸ
• Հայաստանում Ֆրանսիայի Հանրապետության դեսպանի առաջին խորհրդական Ժյուլի ՖՈՐԹԸ
• Հայաստանում Կանադայի արտակարգ և լիազոր դեսպան ​Ն․Գ․ Էնդրյու ԹԸՐՆԵՐ​Ը
• Հայաստանում Բելգիայի Թագավորության արտակարգ և լիազոր դեսպան Ն․Գ․ Էրիկ Դե ՄՈՒՅՆՔ​Ը
• Հայաստանում Չեխիայի Հանրապետության արտակարգ և լիազոր դեսպան Ն.Գ. Պետր ՊԻՐՈՒՆՉԻԿԸ
• Հայաստանում ՄԱԿ-ի Զարգացման ծրագրի (ՄԱԶԾ) մշտական ներկայացուցիչ ​Նաթիա ՆԱՑՎԼԻՇՎԻԼԻ​Ն
• ՄԱԿ ՓԳՀ հայաստանյան գրասենյակի ժամանակավոր պաշտոնակատար և զարգացման հարցերով ավագ ղեկավար Լուի ՖԱԼՍԻՆ
• Երևանում Գերմանիայի Դաշնային Հանրապետության դեսպանատան Զարգացման համագործակցության ղեկավար​ Կատրին ԲՈՒԴԵՐ-ՓԵԼՑ​Ը

Խոսնակները ևս մեկ անգամ վերահաստատեցին իրենց հանձնառությունը՝ մարդու իրավունքների պաշտպանության, հավասարության և խտրականության դեմ պայքարի ուղղությամբ՝ ընդգծելով, որ անվտանգ, ներառական և արժանապատիվ հասարակության կառուցումը հնարավոր է միայն համատեղ և շարունակական համագործակցության միջոցով։ Իրենց ելույթներում նրանք կարևորեցին քաղաքացիական հասարակության դերը, միջազգային համերաշխությունը և պետության պատասխանատվությունը՝ ապահովելու յուրաքանչյուր մարդու հիմնարար իրավունքների պաշտպանությունը՝ անկախ սեռական կողմնորոշումից, գենդերային ինքնությունից, ազգային պատկանելությունից կամ սոցիալական կարգավիճակից։

Քննարկման սկզբում «Դիգնիթի» ՀԿ մարդու իրավունքների և շահերի պաշտպանության համակարգող Ալինա Միրզոյանը ներկայացրեց «ԼԳԲՏ+ անձանց կարողությունների զարգացում Հայաստանում՝ բարելավված իրավական պաշտպանության, իրազեկման և տնտեսական ու սոցիալական ներառման միջոցով» ծրագիրը, որը իրականացվել է Հայաստանում Ֆրանսիայի դեսպանատան ֆինանսական աջակցությամբ։

Հաջորդիվ տեղի ունեցան թեմատիկ ելույթներ և քննարկումներ, որոնք ընդգրկեցին մի շարք կարևոր հարցեր․

Հայաստանում՝

• ԳԲՏ, միգրանտ և փախստական ազատազրկված անձանց իրավիճակը քրեակատարողական հիմնարկներում , ներկայացվեց ՀՀ ԱՆ ՔԿՀ-ներում և մարմիններում հասարակական վերահսկողություն իրականացնող հասարակական դիտորդների խմբի նախագահ Սերգեյ ԳԱԲՐԻԵԼՅԱՆԻ կողմից
• Սեռական կողմնորոշման և գենդերային ինքնության հիմքով իրավախախտումները, ներկայացվեց «Արդարադատության հասանելիություն» ՀԿ նախագահ Շուշան ԽՆԿՈՅԱՆԻ կողմից
• Օրենսդրական բացերը ԼԳԲՏ+ անձանց իրավունքների պաշտպանության ոլորտում, ներկայացվեց «Դիգնիթի» ՀԿ փաստաբան Անահիտ ՄԿՐՏՉՅԱՆԻ կողմից
• ԼԲՏ կանանց հիմնախնդիրները , ներկայացրեցին «Մարդու իրավունքների և հանրային առողջության» ՀԿ ներկայացուցիչներ Օլյա ՆԱԼԲԱՆԴՅԱՆԸ և Անի ԴԱՎԹՅԱՆԸ
• ԼԳԲՏ+ երիտասարդների մարտահրավերները, ներկայացվեց ԻՄՊՈՒԼՍ երիտասարդական սոցիալ-մշակութային ՀԿ գործադիր տնօրեն Սարգիս ԱՅՎԱԶՅԱՆԻ կողմից։

Յուրաքանչյուր թեմատիկ ելույթից հետո նախատեսված էր հարց ու պատասխան, ինչը ապահովեց ակտիվ քննարկում և փորձի փոխանակում մասնակիցների միջև։

Միջոցառումը ամփոփելով՝ «Դիգնիթի» ՀԿ նախագահ Սերգեյ ԳԱԲՐԻԵԼՅԱՆԸ ընդգծեց ոլորտում շարունակական համագործակցության և համակարգված ջանքերի կարևորությունը, ապա դիմեց համայնքին․

«Ձեր կյանքն ունի արժեք։

Եվ «Դիգնիթին», բոլոր մեր գործընկերների հետ, ստանձնում է մի պարտավորություն. մենք շարունակելու ենք ոչ թե խոսել Ձեր «փոխարեն», այլ` լինել Ձեր կողքին ` Ձեր ձայնն ավելի ուժեղ դարձնելու համար։

Եվ հիշեք․ ԴՈւՔ ԼՍԵԼԻ ԵՔ, ԴՈՒՔ ՏԵՍԱՆԵԼԻ ԵՔ ԵՎ ՄԵՆՔ ՁԵՐ ԿՈՂՔԻՆ ԵՆՔ»։